Líonra NEARTÚ ag obair ar son cearta comhionanna do dhaoine faoi mhíchumas

Tá tionscadal ABAIR.ie i gColáiste na Tríonóide ag cur Teicneolaíochtaí Urlabhra agus Teanga ar fáil don Ghaeilge. Tá rochtain do chách mar bhun-aidhm ag ABAIR agus forbairtí á ndéanamh ar áiseanna rochtana agus oideachais. Is léir go bhfuil éileamh air seo ó na fiosrúcháin rialta a thagann isteach cheana féin. Sa Phlean Digiteach don Ghaeilge, tá béim ar an ngá atá le taighde agus le forbairtí teicneolaíochta a chinnteoidh rochtain ar an teanga dóibh siúd le míchumas. Moltar líonraí abhcóideachta a bhunú a thacóidh leis an bhforbairt ar áiseanna rochtana. Le déanaí dhaingnigh Rialtas na hÉireann an Coinbhinsiún maidir le Cearta Daoine atá faoi Mhíchumas. Mar fhreagra ar an riachtanas seo, díreoidh líonra NEARTÚ:

• ar chumarsáid le foirne forbartha na mbogearraí, maidir le riachtanais, dearadh na n-áiseanna agus tastáil orthu le linn forbartha.
• ar fhorleathnú na n-áiseanna i measc an phobail agus chun aiseolas a thabhairt d'foirne forbartha maidir le cothabháil agus leasú leanúnach.
• ar shaineolas agus ar chomhairle phraiticiúil a chur ar fáil do lucht a úsáide, do thuismitheoirí, do mhúinteoirí, do theiripeoirí, agus eile, faoi áiseanna rochtana don Ghaeilge, agus comhairle i dtaca leis an taighde is déanaí ar shealbhú teanga agus ar bhuntaistí an dátheangachais.

Ag an ócáid seo roinnfear eolas faoi na háiseanna atá á bhforbairt ag ABAIR i réimse na rochtana, go háirithe

• Léitheoir scáileáin dóibh siúd le míchumas radhairc
• Geabaire, córas AAC dóibh siúd gan cumas urlabhra
• An togra PRINTTS a dhíreoidh orthu siúd le deacrachtaí litearthachta
• Mol an Óige - áis d'fheasacht na fóineolaíochta agus bunús na litearthachta - a bheidh cabhrach dóibh siúd le disléicse

AIs gá go mbeidh na teicneolaíochtaí urlabhra agus teanga seo ar fáil ar réimse leathan ardán, saorearraí agus gléasanna eile. Tá sé mar aidhm againn go spreagfaidh líonra NEARTÚ rannpháirtíocht ghníomhach trí Ghaeilge do chách.

Léarscáil: Seomra TRiSS (Trinity Research in Social Sciences), C6.002 ar an 6ú urlár i bhFoirgneamh na nEalaíon, Coláiste na Tríonóide