Léargas ar chóras cumarsáide Geabaire

Is féidir le húsáideoirí bogadh ón bPríomhchlár go fo-chláir chun teacht ar stór focal atá níos doimhne nó bainteach le téama ar leith. Cuirtear focail a bhaineann leis an téama céanna le chéile, agus is féidir teacht ar fhormhór na bhfocal seo trí bhrú chnaipe amháin nó ar trí cinn ar a mhéid. Fanann na cnaipí san áit chéanna, chun tacú le hintuarthacht agus le foghlaim luaile.

Is féidir 'Snapback' a úsáid ag am ar bith chun filleadh ar an bPríomhchlár láithreach tar éis focal a roghnú. Ciallaíonn sé seo go bhfuil rochtain thapaidh ar fáil ar na focail ardmhinicíochta atá ag teastáil chun abairt a chumadh. Is féidir 'Snapback' a athrú nó a mhúchadh faoi 'Socruithe' chun iad a chur in oiriúint do riachtanais an duine aonair.

Roghnaíonn úsáideoirí siombailí nó focail chun abairt a chumadh. Taispeántar na focail a roghnaíodh sa bharra abairte, áit a ndéantar athbhreithniú gramadaí ar an teachtaireacht sula nglaonn guth sintéiseach ABAIR amach é.

Toisc go n-athraíonn focail de réir a gcomhthéacs gramadaí, úsáideann Geabaire uirlisí próiseála teanga chun tacú le cruinn-chumadh abairte ionas nach bhfuil gá le cnaipe ar leith de gach foirm de na focail. Is iad An Gramadóir, an seiceálaí gramadaí Gaeilge a d'fhorbair Kevin Scannell, agus ceartaitheoirí gramadaí breise, lena n-áirítear parsálaí don tuiseal ginideach a forbraíodh laistigh de ABAIR, atá in úsáid faoi láthair.

Sampla de seo ná má bhíonn 'mo' + 'teach' sa bharra abairte ba cheart den seicealaí gramadaí é a athrú go 'mo theach' (le séimhiú). Sampla eile de sin ná go n-athraíonn an parsálaí don tuiseal ginideach abairt 'doras + an + teach' go 'doras an tí'.

Tacaíonn na huirlisí seo le duine chun abairtí cruinne a chumadh, laghdaíonn siad líon na gcnaipí a bheadh le brú, agus cinntíonn siad nach mbíonn na cláir róphlódaithe le siombailí agus focail éagsúla.

Cuireann an cnaipe 'Stad' aicearra ar fáil chun teachtaireachtaí tábhachtacha bainteach le mianta a chur in iúl agus idirbheartaíocht a dhéanamh sa chomhrá. Mar shampla feidhmeanna teanga cosúil le: cabhair a lorg, am breise a lorg, sos a lorg, iarraidh ar dhuine éigin stopadh, agus a mhíniú go bhfuil rud éigin ciotach nó mícheart nó nár tuigeadh an rud a dúradh.

Tá an cnaipe 'Stad' ar gach clár ionas go bhfuil na frásaí seo ar fáil go héasca is cuma cén clár ar a bhfuil an t-úsáideoir.

Ligeann an méarchlár d'úsáideoirí focail a litriú agus teachtaireachtaí a chumadh nach bhfuil ar fáil cheana sa chóras. Tacaíonn sé seo le cúrsaí litearthachta, le féinriar le smaointe neamhspleácha a chur in iúl.

Tá fáil ar litreacha, uimhreacha, poncaíocht, téacs-go-hurlabhra, tacaíocht le litriú agus leis an síneadh fada, forlíonadh focal, agus críoch focail a thuar. Cabhraíonn na feidhmeanna seo le húsáideoirí teachtaireachtaí a chumadh níos tapúla, agus smacht á choimeád acu ar a dteachtaireacht.

Úsáideann Geabaire guthanna sintéiseacha Gaeilge forbartha ag ABAIR sa tSaotharlann Foghraíochta agus Urlabhra i gColáiste na Tríonóide, Baile Átha Cliath. Tá trí mhórchanúint sa Ghaeilge: Connachta, Mumha agus Ulaidh. Laistigh daoibh seo tá fochanúintí lena n-áirítear Gaeilge Mhaigh Eo (atá ar fáil faoi Chúige Chonnacht) agus Gaeilge na nDéise (atá ar fáil faoi Chúige Mumhan).

Is féidir le húsáideoirí an chanúint is fearr leo a roghnú sna socruithe, ag piocadh as guthanna a léiríonn na trí phríomhréigiún chanúna. Leis seo téann an aschur cainte le cúlra teanga an úsáideora, a phobal scoile nó a rogha canúna.

Tá ceithre leagan de Geabaire ar fáil: Clár Chonnacht, Clár na Mumhan, Clár Uladh, agus An Clár Neodrach, an príomhchlár. Tá difríochtaí i stór focal na leaganach éagsúla de na cláir in Geabaire ag freagairt de na canúintí éagsúla. Ligeann sé seo d'úsáideoir fanacht dílis dá rogha canúna seachas a bheith teoranta de leagan caighdeánaithe.

Mar shampla, athraíonn an abairt 'how are you?' ó chanúint go canúint: 'conas tánn tú / conas athánn tú' (Cúige Mumhan), 'caidé mar atá tú / cén dóigh atá ort?' (Cúige Uladh), agus 'cén chaoi a bhfuil tú?' (Cúige Chonnacht).

Cuireadh An Clár Neodrach san áireamh d'fhoghlaimeoirí na teanga, ionas go mbeadh rogha ar fáil do gach éinne.

Cuirfear le réimse na nguthanna sintéiseacha atá ar fáil de réir mar a fhorbraítear iad in ABAIR. Amach anseo, beidh úsáideoirí óga ábalta teacht ar ghuthanna atá níos giorra dá n-aoisghrúpa, dá bhféiniúlacht agus dá roghanna féin.

Má tá ceangal ar leith ag úsáideoir le ceantar Gaeltachta ar leith, is gnách go roghnófaí Gaeilge an cheantair sin. Tá an cheist níos casta do dhaoine eile. Más ag foghlaim na teanga atá úsáideoir, agus iad ag freastal ar Ghaelscoil mar shampla, is minic gurb é An Clár Neodrach a roghnófaí. Má tá Gaeilge ó dhúchas ag úsáideoir is fearr go bhfanfaidís leis an gclár a léiríonn an Ghaeilge atá sa bhaile.

Níl aon lárchanúint labhartha sa Ghaeilge, agus mar sin níl aon ghuth ar leith a théann leis An Clár Neodrach. Agus guth á roghnú, molaimid d'úsáideoirí nach bhfuil ceangal acu le ceantar Gaeltachta ar leith canúint an duine is minice a úsáideann AAC leo a roghnú, mar shampla múinteoir, CCR nó comhpháirtí comhrá.

Má tá ceisteanna fós agat, is fiú iad a phlé le múinteoir an úsáideora, nó ballraíocht a ghlacadh inár líonra tacaíochta, NEARTÚ.

De réir mar a fhorbraíonn Geabaire cuirfear leis an stór focal canúnach.

Tá cnaipe eagarthóireachta ar fáil ar gach Príomhchlár chun ligean d’úsáideoirí agus dá gcomhchainteoirí clár pearsantaithe nasctha a chruthú. Is féidir stór focal, frásaí, grianghraif, agus siombailí pearsantaithe a chur leis an gclár. Go hidéalach bheidís seo ag teacht le téama an chláir lena mbaineann siad. Má chuirtear clár pearsantaithe faoin gcnaipe ‘Bia’, is féidir, mar shampla, íomhá den bhia is fearr leis an úsáideoir a chur leis an gclár.

Ní féidir cur le líon na gcnaipí, iad a bhaint ná iad a bhogadh ó Phríomhchláir Geabaire. Dearadh mar seo é d'aon ghnó. Coimeádann sé loighic inmheánach an chórais, gluaiseacht rialta tríd an chláir, pleanáil luaile, agus san am céanna cinntíonn sé go bhfuil rochtain ag úsáideoirí ar an réimse iomlán focail.